O Nacideiro, Os Castros e Nivieira. PR-G-144 (Rubiá de Valdeorras)

Iniciamos a ruta xunto ao Colexio Público de Rubiá en dirección á canteira, enseguida sae unha pista onde hai un panel explicativo da ruta que está perfectamente marcada, cos puntos de interese sinalizados, pasais de madeira sobre os regueiros e (incrible pero certo!) unha papeleria cada medio quilómetro. O que non fala nada ben dos que deseñaron, encargaron e pagaron este roteiro, quen vai recoller o lixo polas vereas do monte?. Polo demais é unha ruta estupenda que transcorre polos caborcos dos regueiros de Valdaoliva, O Nacideiro e Os Castros que van conformar o río Cigüeño que desemboca no Sil no centro do Barco, pasa polos prados da Nivieira (fonte) e ascende ao Alto de Cales desde onde temos unha magníficas vistas de Rubiá e O Barco. Na baixada imos sorprendernos cun tramo de impresionantes rodadas de carro antes de chegar de novo a Rubiá.